दुचाकी फेरीद्वारे दिव्यांग बांधवांची मतदानविषयक जनजागृती

पिंपरी :- पिंपरी चिंचवड महानगरपालिका, घरकुल अपंग सहाय्य संस्था आणि अपंग सहाय्य संस्था यांच्या संयुक्त विद्यमाने निगडीतील भक्ती शक्ती चौक ते मोरवाडी दिव्यांग भवन दरम्यान दिव्यांग बांधवांच्या भव्य दुचाकी रॅलीचे आयोजन करण्यात आले होते. याद्वारे मतदानविषयक जनजागृती करण्यात आली.

उप आयुक्त अण्णा बोदडे, दिव्यांग संस्थांचे दत्तात्रय भोसले, संगिता जोशी, समाज कल्याण विभागाचे सहाय्यक आयुक्त तानाजी नरळे, श्रीनिवास दांगट, मुकेश कोळप, जनता संपर्क अधिकारी प्रफुल्ल पुराणिक, पिंपरी विधानसभा कार्यालयाचे राजेंद्र कांगुडे, महालिंग मुळे, दिनेश जगताप, संदीप सोनवणे, चिंचवड विधानसभा कार्यालयाचे राजाराम सरगर, पल्लवी गायकी, ज्योती पाटील, दिपक येन्नावार, भोसरी विधानसभा कार्यालयाचे अमोल फुंदे, संतोष धोत्रे, विनायक भुजबळ उपस्थित होते.

आयुक्त शेखर सिंह यांनी झेंडा दाखवल्यानंतर रॅलीला सुरूवात झाली. ‘’नारी शक्तीचा सन्मान करू, सर्व महिला मतदार मतदान करू’’, ‘’मतदार राजा जागा हो, लोकशाहीचा धागा हो’’, ‘’मतदानाचा टक्का वाढवू, देशाला सशक्त सरकार देऊ’’, ‘’मतदान माझा जन्मसिद्ध अधिकार आहे आणि तो मी बजावणारच’’, अशा घोषणा देत, मतदान जनजागृतीचे संदेश फलक रॅलीत होते. दिव्यांग बांधवांनी ‘’लोकशाहीवर निष्ठा ठेवून, निवडणुकांचे पावित्र्य राखू आणि निर्भयपणे तसेच धर्म, वंश, जात, समाज, भाषा यांच्या विचारांच्या प्रभावाखाली न येता किंवा कोणत्याही प्रलोभनास बळी न पडता मतदान कर’’ अशी शपथ घेतली आणि मतदान करण्याचा निर्धार व्यक्त केला.
येत्या त्या लोकसभा निवडणुकीत १०० टक्के मतदानाचा आमचा निर्धार आहे. आम्ही दिव्यांग असूनही मतदानाचा हक्क बजावणार आहोत. तुम्हीही मतदान करून तसाच हक्क बजवावा, असे आवाहन दिव्यांग दुचाकी रॅलीमध्ये सहभागी झालेल्या बांधवांनी केले.

कार्यक्रमाचे प्रास्ताविक आण्णा बोदडे यांनी केले. सुत्रसंचालन प्रफुल्ल पुराणिक यांनी तर आभार श्रीनिवास दांगट यांनी मानले.