आढळरावांच्या विजयासाठी फडणवीस, अजितदादा मैदानात

पिंपरी – शिरुर लोकसभा मतदारसंघातील महायुतीचे उमेदवार शिवाजीराव आढळराव पाटील यांच्या प्रचारासाठी भोसरीत आज शुक्रवारी (१० मे) उपमुख्यमंत्री देवेंद्र फडणवीस यांची ‘विजयी संकल्पसभा’ होणार आहे. या सभेत उपमुख्यमंत्री अजित पवार यांचीही तोफ धडाडणार आहे. भोसरीतील या सभेच्या निमित्ताने महायुतीच्या वतीने जोरदार शक्तीप्रदर्शन करण्यात येणार आहे.
भोसरी येथील गावजत्रा मैदानावर सायंकाळी ६ वाजता ही सभा होणार आहे. याविषयी आमदार महेश लांडगे म्हणाले की, गेल्या लोकसभा निवडणुकीत भोसरी विधानसभेतून आढळराव यांना ३७ हजाराहून अधिक मताधिक्य मिळाले होते. यावेळी १ लाखाचे मताधिक्य देण्याचा संकल्प केला आहे. शिरुरमधील विजयाची सुरूवात भोसरीतून होईल. भोसरी मतदारसंघ निर्णायक राहणार आहे. जनसंवाद बैठकांच्या माध्यमातून तळागाळातील सर्व घटकांसोबत संवाद करण्यात आला आहे. सर्व कार्यकर्त्यांचा उत्साह आणि मतदारसंघातील सकारात्मक वातावरण पाहता महायुतीची ‘विजयी संकल्प’सभा यशस्वी होईल, असे लांडगे म्हणाले.
—