पुणे :एकपात्री , नाट्य , चित्रपट, मालिका अशा विविध माध्यमातून गेली पन्नासहून अधिक वर्षे रसिकांचे मनोरंजन करणारे जेष्ठ रंगकर्मी हास्य कलाकार दिलीप हल्याळ यांचे हृदयविकाराने निधन झाले आहे. त्यांचे वय ६५ वर्षे होते.
‘बंपर लाफ्टर, नजराणा हास्याचा’ या एकपात्री, द्वीपात्री कार्यक्रमातून त्यांनी रसिकांच्या मनात आनंदाची पेरणी केली. एकपात्री कलाकार परिषदेचे ते माजी अध्यक्ष होते.
‘कथा अकलेच्या कांद्याची, सौजन्याची ऐशी तैशी, करायला गेलो एक, माणसं अशी वागतात का?’ अशा विविध नाटकांचे त्यांनी नऊ हजाराहून अधिक प्रयोग केले होते. ‘दोघी, शुभमंगल सावधान, बाबा लगीन, जाऊ तिथे खाऊ , नऊ महिने नऊ दिवस’ अशा विविध चित्रपटातून त्यांनी भूमिका केल्या होत्या. ‘टोकन नंबर वन, मॅडम, फिरकी, दैवचक्र’ अशा मालिकातून त्यांनी भूमिका केल्या होत्या. संगीत कार्यक्रमांचे रंगतदारपणे सूत्रसंचालन करण्यात त्यांचा हातखंडा होता.
त्यांच्या पश्चात त्यांच्या पत्नी मेघा हल्याळ आणि दोन विवाहित कन्या सुकन्या, क्षितिजा, त्यांचे जावई तसेच एक भाऊ, बहीण ,आई आहेत.
