पिंपरी :- पिंपरी-चिंचवड शहरासाठी आजचा दिवस ऐतिहासिक ठरणार आहे. राष्ट्रवादी काँग्रेसचे आमदार अण्णा बनसोडे यांनी महाराष्ट्र विधानसभा उपसभापती पदासाठी उमेदवारी अर्ज दाखल केला आहे.
महायुतीमध्ये विधानसभा उपसभापती पद राष्ट्रवादी काँग्रेसकडे आले आहे. विधानसभा उपाध्यक्षपदासाठी उद्या, २६ मार्च २०२५ रोजी होणाऱ्या निवडणुकीसाठी अर्ज भरण्याचा आज शेवटचा दिवस असून महायुतीच्या वतीनं राष्ट्रवादी काँग्रेस पक्षाचे पिंपरीचे आमदार श्री. अण्णा बनसोडे यांनी आपला अर्ज दाखल केला. यावेळी राज्याचे मुख्यमंत्री श्री. देवेंद्र फडणवीस यांच्या समवेत उपस्थित राहिले. राष्ट्रवादी काँग्रेसचे अध्यक्ष आणि उपमुख्यमंत्री अजित पवार, मंत्री चंद्रकांत पाटील, उदय सामंत हे उपस्थित होते. आमदार अण्णा बनसोडे यांची उपसभापतीपदी बिनविरोध निवड निश्चित मानली जात आहे. सत्ताधारी पक्षाचे २३६ इतके भक्कम संख्याबळ आणि त्याचवेळी विरोधकांचे केवळ ५२ आमदार विधानसभेत आहेत. हे लक्षात घेता विरोधी पक्षांकडून उपाध्यक्षपदासाठी निवडणूक लढविली जाण्याची शक्यता नाही. त्यामुळे बनसोडे यांची बिनविरोध निवड होण्याची शक्यता आहे.
